“Мәктәпкә җыенырга ярдәм ит!” хәйрия акциясе
Татарстаныбызда 2007 елдан башлап үткәрелә. Ул социаль ярдәмгә мохтаҗ гаиләләрдән беренче сыйныфка укырга барачак – 1 сентябрьдә тәү кат мәктәп бусагасын атлап керәсе балаларга бәйрәм рухын тою мөмкинлеге тудыру, аз тәэмин ителгән гаилә балаларына, инвалидларга адреслы ярдәм күрсәтү – мәктәп кирәк-яракларын хәстәрләп бирү максатыннан оештырыла.
Бөгелмәдә бу чара традициягә әверелде: яңа уку башланыр алдыннан муниципаль район башлыгы ишле гаилә балаларына быел да кирәк-яраклар алу өчен акча сертификаты тапшырды. Исемлектә 7 бала тәрбияләнүче Зиляевлар, 4 балалаы Фәхриевлар, 5 балалы Петрухиннар, 8 балалы Газизуллиннар бар иде.
– Бала чакны бәхетле итү беркайчан да соңга кала торган гамәл түгел. Булачак беренче сыйныф укучылары бүген бераз гына булса да, үзләрен бәхетлерәк хис иткәндер дип ышанам, – диде шәһәр мэры.
Бөгелмә муниципаль районында быел беренче сыйныфка 1 232 бала барачак. Шулар арасында 51 бала хәйрия ярдәменә аеруча мохтаҗ. Аларга һәм 2 – 11 сыйныфларда укучы аз тәэмин ителгән тагын 79 балага Бөгелмә районы башлыгы, мәктәпләрнең попечительләр советлары, микрорайоннар депутатлары, предприятиеләр вәкилләре, эшмәкәрләр һәм педагогик коллективлар тарафыннан матди ярдәм күрсәтелде.