Бөгелмәдә имамнар җыелышы узды
Мөселманнар өчен изге бәйрәм алдыннан Бөгелмә шәһәренең Үзәк мәчетендә имамнар җыелышы узды. Әлеге чара Бөгелмә шәһәре һәм Бөгелмә районы имам-мөхтәсибе, Татарстанның Көньяк-көнчыгышы казые Рамил хәзрәт Хөснетдинов рәислегендә узды, анда Бөгелмә шәһәре һәм районы мәчетләре имамнары, шулай ук мөхтәсибәт бүлекләре җитәкчеләре катнашты.
Очрашу барышында имам-мөхтәсиб Рамил хәзрәт Хөснетдинов шәһәр һәм район имамнарын гает намазын үткәрү тәртибе белән таныштырды. Шулай ук Роспотребнадзор тәкъдим иткән саклану чараларын үтәү кагыйдәләрен искә төшерде.
Әңгәмә барышында имамнар районда санитар-эпидемиологик вәзгыять һәм бәйрәм чаралары уздыру кагыйдәләре турында фикер алыштылар. Җыелыш азагында имамнар Аллаһка мактау сүзләрен ирештерделәр һәм тынычлык, сәламәтлек, бөгелмәлеләр һәм тулаем республика өчен барлык игелекләрне сорадылар.