Ак таяк көне - күрмәүче кешеләр символы
Бу көн күрү буенча инвалидлар проблемаларына игътибарны җәлеп итүгә юнәлдерелгән. «Единая Россия» партиясенең Татарстан төбәк бүлеге, Бөтенроссия сукырлар җәмгыятенең җирле бүлекчәсе белән берлектә, «Ак таяк» социаль акциясе үткәрде. Чара барышында «Бердәм Россиянең Яшь Гвардиясе» активистлары шәһәр урамнарында машина йөртүчеләргә мөрәҗәгать тексты белән листовкалар тараттылар, аларда «Юл хәрәкәте кагыйдәләре»нең 14.5нче пункты нигезендә, машина йөртүче барлык очракларда да, шул исәптән җәяүлеләр аркылы чыгу урыннарыннан тыш та, ак таяк белән сигнал бирүче сукыр җәяүлеләрне үткәрергә бурычлы, дип искәртелде. Ак таяклыларны озатып йөрүче активистлар үтеп баручыларга начар күрүче һәм сукыр кешеләрнең юл аркылы чыкканда ярдәмгә мохтаҗ икәнлеген күрсәтте, машина йөртүчеләрнең игътибарын җәлеп итте.
Сукырлар җәмгыятенең Бөгелмә бүлеге рәисе Артем Пахарев интервью бирде, ул инвалидлар хәрәкәте проблемалары турында сөйләде, шул исәптән: «Бөтенроссия сукырлар җәмгыятенең җирле бүлекчәсендә 434 кеше исәптә тора, аларның күбесе сукыр, яки күрү сәләте бик начар булган кешеләр, аларның хәрәкәте махсус тернәкләндерү чараларын кулланмыйча мөмкин түгел диярлек, аларның берсе – ак таяк», – дип билгеләп үтте.
Халыкара «Ак таяк» көне 1970 елда Халыкара сукырлар федерациясе инициативасы белән оештырыла. 1987 елда әлеге акциягә Россия сукырлар җәмгыяте кушыла һәм әлеге вакыйгага багышланган чаралар үткәрә.
Арсен Байчоров, «Единая Россия» партиясе Бөгелмә җирле бүлегенең әйдәп баручы белгече, «Бердәм Россиянең Яшь Гвардиясе» бөтенроссия сәяси партиясенең җирле бүлекчәсе җитәкчесе.