Бөгелмәдә быел беренче гомумшәһәр өмәсе 3 апрельдә узачак

2021 елның 29 марты, дүшәмбе

Татарстан Республикасында 1 апрельдән санитар-экологик икеайлык башлана.

Бу чорда Бөгелмәдә ишегаллары, парклар һәм скверлар, урам буйларындагы яшел зоналар, светофорлар һәм юл билгеләре, биналар һәм торак йортларның фасадлары, балалар мәйданчыклары тәртипкә китереләчәк.

Инде 3 апрельдә үк бөгелмәлеләрне кар көртләре һәм якын-тирә территорияләрдән чүп-чар җыю буенча эшләргә чыгарга чакыралар.

Барлыгы, санитар-экологик икеайлык дәвамында, шәһәр һәм районда 8 гомумшәһәр өмәсе оештырылачак. Чараларга санкцияләнмәгән чүплекләрне бетерү, чүп-чар җыю һәм чыгару, коймаларны, бордюрларны буяу, агач һәм куаклар утырту, җәмәгать киңлекләрен тематик бизәү һ. б. керәчәк.