Бөгелмәлеләр Сабантуй бәйрәмен билгеләп үттеләр
Бөгелмәдә халык бәйрәме Сабантуй-2021 узды. Бәйрәм чарасында рәсми затлар катнашты: алтынчы чакырылыш ТР Дәүләт Советы депутаты, «Татэнергосбыт» АҖ директоры Рифнур Сөләйманов, Бөгелмә муниципаль районы башлыгы, шәһәр мэры Линар Закиров, Яр Чаллы шәһәре мэры, шәһәрнең Мактаулы гражданины Наил Мәһдиев.
Иртән бәйрәм кунаклары «Бөгелмә районының этнокультура маршруты» дип аталган авыл җирлекләре күргәзмәсендә булдылар, анда Бөгелмә районында яшәүче халыкларның традицион аш-сулары һәм көнкүреше белән таныштылар. Алар арасында - руслар, татарлар, чувашлар, үзбәкләр, Әзербайҗан, мордвалар, украиннар, башкортлар.
Бәйрәм кунаклары шулай ук фольклор мәйданчыкларында, авыл хуҗалыгы техникасы һәм эшкәртү сәнәгате предприятиеләре күргәзмәсендә булдылар.
Сабантуйны ачу тантанасыннан соң, муниципаль район башлыгы, шәһәр мэры Линар Закиров районның иң яхшы механизаторларын бүләкләде. Шулай ук авыл хуҗалыгы предприятиеләре, эшкәртү сәнәгате предприятиеләре хезмәткәрләре, фермерлар да билгеләп үтелде.
Бәйрәм барышында бөгелмәлеләр өчен татар эстрадасы йолдызлары чыгыш ясады: «Болгар» бию театры, Башкортстан Республикасының һәм Татарстан Республикасының атказанган артисты Ришат Төхвәтуллин, Халыкара конкурслар лауреаты Гөлназ Солтанова.
Балалар бу вакытта аттракционнарда, уеннарда һәм конкурсларда күңел ачтылар. Спортчылар милли көрәш, армспорт буенча ярышларда көч сынаштылар. Күпләрне баганага менү һәм өлкәннәр өчен милли шаян ярышлар җәлеп итте. Һәм, әлбәттә, ат чабышлары.
Милли көрәш нәтиҗәләре буенча абсолют батыр булып Әскәр Сафин калды.